ᐱᓕᕆᐊᒃᓴᐃᓪᓗ ᑮᓇᐅᔭᒃᓴᓂᒃᑕᐅᓂᖏᓪᓗ

ᑮᓇᐅᔭᒃᓴᓂᒡᕕᐅᔪᓐᓇᕐᓂᖏᑦ

ᐱᓕᕆᐊᒃᓴᖃᕈᒪᓂᕐᒧᑦ ᑐᒃᓯᕋᐅᑎᓕᐊᑦ ᑐᓂᔭᐅᖃᑕᕐᒪᑦ ᐊᐅᓚᑦᑎᔩᑦ ᑲᑎᒪᔨᕋᓛᖏᓐᓄᑦ ᕿᒥᕐᕈᐊᖅᑕᐅᓂᐊᕐᒪᑕ. ᐊᐅᓚᑦᑎᔨᐅᓂᕐᒧᑦ ᑲᑎᒪᔨᕋᓛᑦ ᕿᒥᕐᕈᐊᖃᑦᑕᖅᑐᑦ ᑕᒪᐃᓐᓂᒃ ᐊᑐᓂ ᑐᒃᓯᕋᐅᑎᓕᐊᕆᔭᐅᓯᒪᔪᓂᒃ ᐱᔾᔪᑎᒃᓴᖃᑦᑎᐊᕐᒪᖔᑖ ᖃᐅᔨᓴᖅᑕᐅᓗᑎᒃ, ᑐᑭᓕᐅᕈᑕᐅᓲᖑᓪᓗᑎᒡᓗ ᑮᓇᐅᔭᒃᓴᓂᒃᑕᐅᓇᔭᕐᓂᖏᑦ. ᐊᕐᕋᒍᑕᒫᖅ ᓴᓂᕐᕙᐃᕙᒃᑐᑦ ᑮᓇᐅᔭᓂᒃ, ᒪᓕᒃᑕᐅᓪᓗᑎᒃ ᐊᒥᓱᑦ ᐊᔾᔨᒋᖏᑦᑑᑎᐅᔪᑦ ᐱᔾᔪᑕᐅᔪᑦ ᐊᒻᒪᓗ ᐊᑐᐃᓐᓇᐅᑎᑕᐅᕙᒃᓱᑎᒃ ᐱᓕᕆᐊᒃᓴᐃᑦ ᐃᑲᔪᖅᓱᖅᑕᐅᓯᒪᓂᖏᓐᓂᒃ ᓇᐅᑦᑎᖅᑐᖅᑕᐅᖁᔭᐅᔪᑦ ᐊᒻᒪᓗ ᓄᓇᓕᖕᒥᐅᑕᓄᑦ ᐊᔪᕈᓃᕈᑕᐅᔪᓇᕐᓂᖏᓂ ᐊᑐᕈᓐᓇᖅᑐᓂᒃ ᓇᐅᑦᑎᖅᑐᖅᑕᐅᕙᒃᑐᓂᒃ ᐸᕐᓇᐅᑎᑎᒍᑦ ᓯᕗᓪᓕᐅᑎᑕᐅᔪᓂᒃ, ᑐᕌᒐᕆᔭᐅᔪᓂᒃ, ᖃᓄᐃᓕᐅᖅᑎᓪᓗᐊᑕᐅᓂᖏᓐᓂᒃ ᐊᒻᒪᓗ ᐱᒻᒪᕆᐅᔪᓂᒃ ᐱᓕᕆᐊᕆᕙᒃᑕᖏᓐᓂᒃ ᒪᓕᑦᑎᐊᖅᐸᑕᑦ.

ᐃᓚᐅᔪᓐᓇᖅᑐᑦ ᐃᓚᖃᕈᓐᓇᖅᑐᑦ ᓄᓇᓕᖕᓂᒃ ᐅᕝᕙᓗᓐᓃᑦ ᓄᓇᓕᖕᒥᐅᑕᓂᒃ, ᐃᓄᐃᑦ ᑲᑐᔾᔨᖃᑎᒋᖏᓐᓂᒃ, ᐃᓕᓐᓂᐊᕐᕕᒡᔪᐊᖑᓂᖅᐸᖑᔪᓂᒃ, ᓄᓇᕗᒻᒥ ᑎᒥᖁᑎᒋᔭᐅᓕᖅᑐᓂᒃ ᓄᓇᑖᕈᑎᒥᒍᑦ ᐱᓐᖑᖅᑎᑕᐅᓯᒪᔪᓂᒃ, ᓄᓇᕗᑦ ᒐᕙᒪᐃᑦ ᐱᓕᕆᕕᖁᑎᖏᓐᓄᑦ ᐊᒻᒪᓗ ᑎᒥᖁᑎᖏᓐᓄᑦ, ᐊᒻᒪᓗ ᒐᕙᒪᐅᖏᑦᑐᓄᑦ ᑎᒥᖁᑎᒋᔭᐅᔪᓄᑦ. ᑮᓇᐅᔭᓕᐅᖅᑎᐅᕙᖏᑦᑐᑦ ᑎᒥᖁᑎᒋᔭᐅᔪᑦ ᓲᕐᓗ ᑐᑭᓯᓂᐊᖅᑎᐅᓂᕐᒧᑦ ᐱᓕᕆᕕᐅᔪᑦ, ᐅᕝᕙᓗᓐᓃᑦ ᐊᖏᔫᑎᓂᒃ ᓴᓈᖃᖅᑐᑦ, ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐃᖃᓇᐃᔭᕐᕕᐅᔪᑦ ᐊᒻᒪᓗ ᑎᒥᖁᑎᖏᑦ ᐃᓚᐅᔪᓐᓇᖃᑦᑕᖅᑐᑦ ᑭᓯᐊᓂ ᑮᓇᐅᔭᒃᓴᓂᒃᑕᐅᔪᓐᓇᕐᓂᕐᒧᑦ ᐃᓚᒋᔭᐅᔪᓐᓇᕐᓂᕐᒧᑦ ᑭᓯᐊᓂ ᐊᓯᖏᓐᓄᑦ ᐊᔪᖏᓐᓂᖃᖅᑎᑕᐅᔪᓄᑦ ᑲᑐᔾᔨᖃᑎᒋᖕᓄᑦ, ᖁᓛᓂ ᐅᖃᐅᓯᐅᔪᑦ ᒪᓕᒃᑕᐅᓗᑎᒃ. ᐱᒋᐊᖅᑎᑕᐅᔪᒪᔪᑦ ᐱᓕᕆᐊᒃᓴᐃᑦ ᑲᔪᓯᑎᑕᐅᓯᒪᔭᕆᐊᖃᖅᑐᑦ ᐊᖏᖅᑕᐅᓯᒪᔪᓄᑦ ᑭᓯᐊᓂ ᐃᓚᐅᔪᓐᓇᖅᑐᓄᑦ, ᑮᓇᐅᔭᒃᓴᓂᒃᑕᐅᔪᓐᓇᕐᓂᐊᕈᑎᒃ ᑕᒪᐃᓐᓂᒃ ᓄᓇᕗᒻᒥ ᓇᐅᑦᑎᖅᑐᐃᓂᕐᒧᑦ ᐸᕐᓇᐅᑎᓄᑦ.

ᑐᑭᓯᒋᐊᑦᑎᐊᒃᑲᓐᓂᕈᒪᒍᕕᑦ, ᐊᑏᑐᖅ ᐅᖃᕐᕕᐅᓂᐊᖅᐳᑦ ᐅᑯᐊ ᓄᓇᕗᒻᒥ ᑕᒪᐃᓐᓂᒃ ᖃᐅᔨᓴᕈᑎᓄᑦ ᐸᕐᓇᐅᑎᓕᕆᔨᒃᑯᖏᑦ ᐱᔪᒪᒍᕕᑦ ᐊᔾᔨᖏᓐᓂᒃ ᒫᓐᓇᐅᔪᖅ ᐱᓕᕆᐊᒃᓴᓂᒃ ᑐᒃᓯᕋᐅᑎᓕᐅᕈᒪᓂᕐᒧᑦ ᒪᓕᒐᒃᓴᓂᒃ.